ஒரு துளி மானுடம் – அஞ்சுமனின் பெருநாள் சந்திப்பு..


Advertisements

மாணவர் இயக்கங்களின் உரையாடல் நிகழ்ச்சி.


 

செய்தி உதவி : அஞ்சுமன் செயலாளர் லியாகத் அலி

 

மிகச் சிறப்பாக நடைபெற்ற மாணவர் இயக்கங்களின் உரையாடல் நிகழ்ச்சி..

நிகழ்ச்சி குறித்து அஞ்சுமன் முன்வைத்த நோக்கத்தின் விளக்கவுரையாகவே நிகழ்ச்சி அமைந்தது கூடுதல் சிறப்பு.. விவாதத்தை சீராக அமைத்துக்கொள்ள வழங்கப்பட்ட 4 அம்ச கருப்பொருளுக்கு உள்நின்று, வகுக்கப்பட்ட நெறிமுறைகளை மீறாமல் மிகச் சிறந்த உரையாடல் அரங்கைக் கட்டமைத்த கருத்தாளர் அனைவரும் நன்றிக்கும் பாராட்டுக்கும் உரியவர்கள் ஆவர்..

இச்சனநாயக உரையாடலை மேற்கொண்ட கருத்தாளர்கள் அன்பிற்கினிய அஹமத் ரிஸ்வான் (SIO) அப்ஜெல் பாஷா (SMI), வதனுர் சே சிவா (RSF) அனஸ் சுல்தானா (SFI), எழிலன் (Aisf) , சுஹைல் அப்துல் ஹமீது (ASA) ஆகிய அனைவரும் மிகச் சிறப்பாக தங்கள் கருத்துக்களை பதிவு செய்தார்கள்..

விவாதத்தின் இடையீட்டாளர்களாக அமைந்த தோழர்கள் ஜலால் , விசாகன் மையக் கருத்துக்களை உள்வாங்கி செம்மையான தொகுப்புரையை வழங்கினர். இதற்கு தலைமையேற்று நெறிபடுத்திய பேரா. இளங்கோ நாகமுத்து தம்முடைய தனி முத்திரை பதித்த நிறைவு கருத்துக்களை பதிவு செய்து நிகழ்ச்சியை வேறொரு தரத்திற்கு உயர்த்தினார்..

நோக்கர்களில் பாலசுப்ரமணியன் ஜென்னி உட்பட மூவர் தங்களின் கருத்துக்களை அழகாக எடுத்துரைத்தனர். பங்கேற்ற அனைவரும் காலத்தின் தேவையறிந்து முன்னெடுக்கப்பட்ட நிகழ்ச்சியையும் அதன் அமைப்பையும் வெகுவாக பாராட்டி இது ஒரு தொடக்கம்.. இது மேலும் வெவ்வேறு மட்டங்களில் தொடரும் என்று மகிழ்ச்சி தரும் செய்தியை வழங்கிச் சென்றனர்..

செல்பேசி தொழில்நுட்ப பயிற்சி வகுப்பு நிறைவு விழா


கோட்டக்குப்பம் குவைத் ஜமாஅத் நிதி நல்கையில் அஞ்சுமனில் நடைபெற்ற செல்பேசி தொழில்நுட்ப பயிற்சி வகுப்பில் கலந்து கொண்டு நிறைவு செய்த 35 மாணவர்களுக்கு சான்றிதழ் வழங்கும் நிகழ்வு இன்று (24.6.18) மாலை நடைபெற்றது.. அஞ்சுமன் செயலாளர் ஜனாப். லியாகத் அலி @ கலீமுல்லாஹ் அவர்கள் நிகழ்ச்சிக்கு வாழ்த்துரை வழங்கினார். நிகழ்வில் குவைத் ஜமாஅத் பொறுப்பாளரும் ஜெய்னுதீன் யாசீன், பயிற்சி வழங்கிய மையத்தின் இயக்குனர் சக்திவேல், ஜமாஅத்தின் உள்ளூர் நிர்வாகிகள் ஜமாஅத் உறுப்பினர்கள் என திரளாக கலந்து சிறப்பித்தனர்.

பெரும் சிரமத்திற்கு மத்தியில் எதிர்கால நன்மையைக் கருதி கடந்த 3 ஆண்டுகளாக புனரமைக்கப்பட்டு மேம்படுத்தப்படும் அஞ்சுமன் உள்கட்டமைப்பு வசதிகள் உரிய பலனைத் தரத் துவங்கியிருப்பதில் பெரும் மகிழ்ச்சி.. அறிவு தேட்டத்திற்கும் ஆற்றல் படுவதற்கும் அஞ்சுமனை அதிகமதிகமாக மாணவர்களும் இளைஞர்களும் பயன்படுத்திக் கொள்ள முன்வரும் போதுதான் அவர்களுடைய தேவைகளைக் கண்டறிந்து அதற்கேற்ற முயற்சிகளை மேற்கொள்வது சாத்தியமாகும் என்பதை நினைவில் கொள்ளுங்கள்.

 

கோட்டக்குப்பம் ஆவணப்பட விழா


கோட்டக்குப்பம் அஞ்சுமன் நூலகத்தின் ரீசைக்கிள் பின் வாசகர் வட்டம் (01.05.18) இன்று கோட்டக்குப்பம் வரலாற்றின் முதல் ஆவணப்பட விழாவை கவி கா.மு. ஷெரீஃப் நினைவரங்கில் அரங்கேற்றியது.. விழாவிற்கு அஞ்சுமன் செயலாளர் அ.லியாகத் அலி தலைமை தாங்கினார். வாசகர் வட்டத்தின் பொறுப்பாளர் அனஸ் சுல்தான் வரவேற்புரை ஆற்றினார். அஞ்சுமன் செயலாளர் அவர்கள் //முஸ்லிம் சமூகம் ஊடகங்களைக் குறை பேசிக் கொண்டிருப்பதை விடுத்து, அவற்றில் பங்கேற்பது குறித்தும் பங்களிப்பது குறித்தும் சிந்திக்க வேண்டும்.. தங்களின் கலாச்சார, பண்பாட்டு சிக்கல்களை ஆவணப்படுத்த தகுந்த முயற்சிகளை மேற்கொள்ள இதுபோன்ற விழாக்கள் பயனளிக்கும்// என்ற அஞ்சுமனின் நம்பிக்கையைத் தன் தலைமையுரையில் பதிவு செய்தார்.

விழாவைத் தொடங்கி வைத்துப் பேசிய தமிழ்நாடு முற்போக்கு எழுத்தாளர் கலைஞர்கள் சங்கத்தின் துணைத்தலைவர் தோழர்.கருப்பு கருணா, //சினிமா, இசை ஹராம் என்று நீண்டகாலமாக கட்டமைக்கப்பட்ட சமூகத்தில், ஆவண மற்றும் குறும்படம் குறித்த பார்வையும் உரையாடலும் நடைபெறுவது உள்ளூர் திறன்களை வெளிக்கொணர பேருபகாரமாக அமையும். அதுவே இந்த விழாவின் மாபெரும் வெற்றி// என்றார்.

சுமார் 10.45 மணியளவில் தமிழ் முஸ்லிம்களின் வேர்களைத் தேடும் “யாதும்” ஆவணப்படம் திரையிடப்பட்டது.. படம் முடிந்த பிறகு, படத்தின் இயக்குநர் கொம்பை அன்வர் , படத்தை எடுக்க நேர்ந்த பின்னணியையும் தமிழ்ச் சமூகத்தில் இயல்பாகவே இழையோடும் இணக்கக் கூறுகளைத் உயர்த்திப் பிடிக்க வேண்டிய அவசியத்தை எடுத்துரைத்தார். தொடர்ந்து //ஆவணப்படம் எடுப்பதை எளிமையான விசயமாக கருதாமல், மக்களுக்கான குரலைப் பதிவு செய்யும் பணியாக சிரத்தையோடு செய்ய வேண்டும். ‘யாதும்’ ஆவணப்படத்தின் ஒரு ஃபிரேம் கூட இதுவரை யாராலும் ஆட்சேபிக்கப் படவில்லை என்பதே அதன் உண்மைத் தன்மையையும் பின்னணியில் உள்ள உழைப்பையும் பறைசாற்றும்// என்று பேசினார்..

இரண்டாவது அமர்வில் முதுகெலும்பு (அழிந்து வரும் விவசாயம்), டுலெட் (வாடகை வீடு பிரச்சனை), முங்கேசா (தண்ணீர் பிரச்சனை குறித்த ஈரானிய படம்), கோமல் (குழந்தைகள் பாலியல் தொந்திரவு), கரம்கொடு (இரத்ததானத்தை வலியுறுத்த உள்ளூர் இளைஞர்கள் தயாரித்த படம்) என பல்வேறு விருது பெற்ற படங்கள் திரையிடப்பட்டன. இந்த படங்கள் குறித்தப் பார்வையை பதிவு செய்த தாகூர் கலைக்கல்லூரி தமிழ்த்துறைத் தலைவர் பேரா.இளங்கோ நாகமுத்து சுவைஞர்களோடு சுவாரஸ்யமான உரையாடலை நிகழ்த்தினார். முழுநீள திரைப்படங்களுக்கும், ஆவண மற்றும் குறும்படங்களுக்கும் உள்ள வேறுபாட்டை விளக்கிச் சொன்னது சிறப்பாக அமைந்தது.

மதிய உணவு இடைவேளைக்குப் பின் தொடங்கிய மூன்றாம் அமர்வில், நடந்த கதை (சாதிய ஒடுக்குமுறை), மக்கு (படிப்பு தீவிரவாதம்) ஆட்டோக்கார அண்ணன் (ஆட்டோக்காரர் அவலம்), அஞ்சுமன் நூலகம் (வரலாற்று ஆவணம்), God is Greatest (சிரிய உள்நாட்டுக் கலவரத்தில் கொல்லப்படும் சாமானியர்கள்), மாற்று விவசாயம் குறித்த படம், Refuge (அகதிகள் குறித்த படம்) ஆகியவை திரையிடப்பட்டன. மேற்படி படங்கள் குறித்து ஈழ எழுத்தாளர் திரு. கவுரிபால் சாத்திரி கருத்துரைத்தார். ஒரு அகதியின் உணர்வு சார்ந்த போராட்டத்தை சொந்த அனுபவத்தில் எடுத்துரைத்த சாத்திரி, //என் தாயை முப்பது ஆண்டுகளுக்கு பிறகும் தம்பியை 32 ஆண்டுகளுக்கு பிறகும் சந்தித்த அவலத்தை// உணர்ச்சி பிழம்பாகப் பேசினார்.

நிறைவு நிகழ்வாக காயிதே மில்லத் கதை திரையிடப்பட்டது. விழாவில் ஊடகவியலாளர் திரு. PNS. பாண்டியன் வழங்கிய வாழ்த்துரையில் கோட்டக்குப்பம் புதுவையோடு இல்லாதது குறித்தும் கோட்டக்குப்பத்தில் தாம் இல்லாதது குறித்தும் தன் ஆதங்கத்தைப் பதிவு செய்தார். இறுதியாக நிறைவுரையாற்றிய புதுவை நகர ஜமாத்தே இஸ்லாமி தலைவர் அப்துல் ஹமீத் , இன்றைய சூழலில் ஊடக வலிமைதான் ஒரு சமுதாயத்தின் நிஜ வலிமை என்பதைக் குறிப்பிட்டு, அந்த ஆயுதத்தை கைகொள்வது குறித்த சிந்தனையை விதைத்து விழாவை முடித்து வைத்தார்..

குறும்படங்களை இயக்கி வெளியிட்ட இளவல்கள் அனைவருக்கும் “கலைக்குரிசில்” விருது வழங்கி சிறப்பு செய்யப்பட்டது. முடிவில் சிறப்பு விருந்தினர் அனைவரும் ரீ சைக்கிள் பின் வாசகர் வட்டத்திற்கு நினைவுப் பரிசு வழங்கிப் பாராட்டினர். வந்திருந்த சிறப்பு விருந்தினர்களுக்கு நண்பர் ஸ்ரீதரன் “நாத்திகனின் பிரார்த்தனைகளோடு” கௌரவப்படுத்தியது அஞ்சுமன்.. நிறைவாக அஞ்சுமன் இளைஞர் நல செயலர் அப்துல் மாலிக் நன்றியுரை யாற்றினார்..

கட்டுரை உதவி / தோழர் கலீமுல்லாஹ்

மாணவ மாணவிகளுக்கு திறனறி போட்டி


கோட்டக்குப்பம் வரலாற்றில் முதன் முறையாக மாணவ மாணவிகளுக்கு பெரிய அளவில் திறனறி போட்டி அஞ்சுமன் மகளிர் மையம் சார்பில் இன்று ஷாதி மஹாலில் நடைபெற்றது. மாணவ மாணவிகள் பெருமளவில் ஆர்வமுடன் போட்டியில் பங்கேற்றனர். விழாவுக்கான ஏற்பாடுகளை அஞ்சுமன் மகளிர் மன்றம் சிறப்பாக ஏற்பாடு செய்திருந்தனர் 

 

வெற்றி பெற்ற மாணவ மாணவிகளுக்கு விரைவில் நடைபெறும் விழாவில் பரிசுகள் வழங்கப்படும்.

 

அஞ்சுமன் மகளிர் மையம் சார்பில் மாணவ மாணவிகளுக்கு திறனாய்வு போட்டி


கோட்டக்குப்பம் மாணவ மாணவிகளுக்கு முதன் முறையாக பெரிய அளவில் திறனாய்வு போட்டி அஞ்சுமன் மகளிர் மையம் சார்பில் நடைபெற இருக்கிறது.

கல்வி ஆண்டு விடுமுறையை பயனுள்ள வகையில் பயன்படும் வகையில் இந்த போட்டியில் பெருவாரியான மாணவ மாணவிகள் கலந்து கொண்டு,  தங்கள் திறன் அறிந்து கொள்ள அழைக்கப்படுகிறார்கள்.

பெற்றோரும் தங்கள் பிள்ளைகளை இந்த போட்டியில் கலந்து கொள்ள வலியுறுத்தவேண்டுகிறோம்.

 

இலவச செல்போன் சர்வீஸ் பயிற்சி முகாம் துவக்க விழா


கோட்டக்குப்பம் குவைத் ஜமாஅத் நிதி நல்கையில் அஞ்சுமனில் நடைபெறவுள்ள செல்பேசி தொழில்நுட்ப பயிற்சி வகுப்பிற்கான தொடக்க நிகழ்வும் சேர்க்கை முகாமும் நேற்று காலை 9.30 மணியளவில் அஞ்சுமன் வளாகத்தில் சிறப்பாக நடைபெற்றது.. கூட்டத்திற்கு ஜாமிஆ மஸ்ஜித் முத்தவல்லி Moulana Fahrudeen Faruk தலைமை தாங்கினார்.. தொடக்கவுரை ஆற்றிய அஞ்சுமன் நூலக செயலாளர் மௌலவி முஹம்மது பாதுஷா, கூட்டு முயற்சிகளால் விளையக் கூடிய நன்மைகள் குறித்தும், சமுதாய ஆற்றல்கள் ஒருங்கிணைக்கப்பட வேண்டியதன் அவசியம் குறித்தும் செறிவாகப் பேசினார்..

அஞ்சுமன் செயலாளர் திட்ட வரைவு மற்றும் நன்மைகள் குறித்துப் பட்டியலிட்டு, சமூக முன்னேற்றம் குறித்து பல்வேறு நிலைகளில் சிந்தித்து செயலாற்றும் கோட்டக்குப்பம் குவைத் ஜமாஅத் தற்போது பலன்தரும் முதலீடுகளில் கவனம் செலுத்தத் தொடங்கியது குறித்து அஞ்சுமனின் பாராட்டுக்களையும் ஒத்துழைப்பையும் தெரிவித்தார். மேலும் அஞ்சுமன் கட்டமைப்பு வசதிகளை வருங்கால தலைமுறை நன்மை கருதிய திட்டங்களுக்கு பயன்படுத்த ஆவல் கொண்டுள்ள அனைத்து சமுதாய இயக்கங்கள், களப்பணியாளர் அனைவருக்கும் பொது அழைப்பு விடுத்தார்.

நிகழ்வின் இறுதியில் அஞ்சுமன் தலைவர் டாக்டர் எல்.எம். ஷரிஃப், பேரூராட்சி மன்ற மேனாள் தலைவர் இ. அப்துல் ஹமீது ஆகியோர் பதிவு செய்ய வந்தவருக்கு படிவங்களை வழங்கினார். முகாம் நிறைவடைந்த 2 மணிவரை சுமார் 60க்கும் மேற்பட்ட விண்ணப்பங்கள் வரப்பெற்றன. நாளை 10.4.18 மாலை 3.00 மணிவரை விண்ணப்பங்கள் பெறப்படும்.. பெறப்பட்ட விண்ணப்பங்களில் இருந்து 50 நபர்கள் தேர்வு செய்யப்பட்டு ரூபாய் ஒரு லட்சம் செலவில் 60 நாள் பயிற்சி வழங்கப்பட உள்ளது..

பயனுள்ள திட்டத்தை அஞ்சுமனில் செயல் படுத்த முடிவெடுத்து, சிறப்பாக ஆரம்பிக்க ஆவண செய்த ஜமாஅத்தின் தலைவர் Habibur Rahaman, செயலர் Rahamathulla Rahamath, Ghazali Rahamathulla ஆகியோருக்கும் உடனிருந்து உறுதுணையாக கடமையாற்றிய ஜமாஅத்தின் உள்ளூர் நிர்வாகிகள் இருந்த Sadiq Basha, Abdul Malik, Smj Ameen ஆகியோருக்கும் அஞ்சுமனின் நெஞ்சம் நிறைந்த நன்றி..