சுதந்திர விழா – ஒளி வெள்ளத்தில் புதுவை


img_9714

பிரெஞ்சு ஆதிக்கத்தில் இருந்த புதுச்சேரி கடந்த 1954-ம் ஆண்டு நவம்பர் 1-ந் தேதி சுதந்திரம் அடைந்தது.

இருப்பினும் புதுச்சேரி பிராந்தியங்கள் கடந்த 1962-ம் ஆண்டு வரை இந்தியாவுடன் சட்டப்பூர்வமாக இணைக்கப்படாமல் தனி நாடு போல செயல்பட்டது. பிரெஞ்சு பாராளுமன்றத்தில் கடந்த 1962-ம் ஆண்டு ஆகஸ்டு 16-ந் தேதி புதுச்சேரி இந்தியாவுடன் இணைவதற்கான சட்டப் பூர்வ ஒப்பந்தம் நிறைவேற்றப்பட்டது.

இந்த நாள் இந்தியாவுடன் இணைந்த நாளாக புதுவை அரசால் கொண்டாடப்படுகிறது.

இதனையொட்டி புதுவையில் இன்று (செவ்வாய்க்கிழமை) பொது விடுமுறை அறிவிக்கப்பட்டுள்ளது. வழக்கமாக ஆகஸ்டு 16-ந் தேதி வேறு எந்த நிகழ்ச்சிகளும் நடைபெறாது.

ஆனால், புதிதாக பொறுப்பேற்றுள்ள காங்கிரஸ் அரசு சார்பில் கீழூரில் உள்ள நினைவு மண்டபத்தில் சட்டப்பூர்வ பரிமாற்ற நாள் இன்று கொண்டாடப்பட்டது.

விழாவில் புதுவை கவர்னர் கிரண்பேடி, முதல்- அமைச்சர் நாராயணசாமி, சபாநாயகர் வைத்திலிங்கம், அமைச்சர்கள், எம்.எல்.ஏ.க்கள் ஆகியோர் பங்கேற்று மரியாதை செலுத்தினர்.

தொடர்ந்து கவர்னர் கிரண்பேடியும், முதல்-அமைச்சர் நாராயணசாமியும் கீழூர் வாக்கெடுப்பில் பங்கேற்ற சுதந்திர போராட்ட வீரர்களின் தியாகத்தை போற்றி சிறப்புரையாற்றினர். விழாவில் தியாகிகள் கவுரவிக்கப்பட்டனர்.